Аляксей Вешчавайлаў жыў у Гомелі і быў жанаты з беларускай. Але ён быў па паходжанні эрзя. І гэта было настолькі важна для яго, што нават ягоным пазыўным было слова на мардоўскай мове. Малы народ, каланізаваны рускімі, аплаквае Аляксея як свайго героя, піша «Наша Ніва».
Яго ведалі пад нікам «Ледяй». На эрзя гэта азначае «жнец». 31-гадовы Аляксей Вешчавайлаў быў салдатам-наводчыкам 1-й інтэрнацыянальнай роты 517-га батальёна 1-й асобнай брыгады спецыяльнага прызначэння імя Івана Богуна Узброеных сіл Украіны.
Першы раз Аляксей узяў у рукі зброю пасля нападу Расіі на Украіну ў 2014 годзе. Ëн уступіў у 72-ю асобную механізаваную брыгаду імя Чорных запарожцаў і праваяваў два гады.
Пасля завяршэння кантракту ён вярнуўся да жонкі ў Беларусь, дзе яго асудзілі на 2 гады турмы за ўдзел ва ўзброеным канфлікце без дазволу ўладаў. У лютым 2022 года Вешчавайлаў ізноў паехаў ва Украіну змагацца супраць расійскіх захопнікаў.
Аляксей ваяваў у палку «Пагоня» і загінуў у баі пад Дружкаўкаю, што каля Бахмута — адзіным кірунку, дзе рускія працягваюць насядаць.
Аляксей Вешчавайлаў на фронце. Фота тэлеграм-канала Vandy
Пабрацімы байца расказалі «Нашай Ніве», што міна прыляцела ў акоп Вешчавайлава. Ён загінуў на месцы. Яго саслужыўца лёгка параніла.
Аляксея характарызуюць як дасведчанага байца, гумарыста, душу кампаніі.
Рада старэйшын эрзянскага народа назвала Аляксея Вешчавайлава эрзянскім нацыяналістам, «які прыехаў у Украіну, каб дапамагчы гэтай свабодалюбнай нацыі ў барацьбе з расейскім агрэсарам».
«Прызыўны знак Торамы вырывае нашага брата з поля бою — Інешкіпаз забірае яго ў Яблычныя Сады. Туды, дзе Цюшця валадарыць з нашымі продкамі», — паэтычна піша пра загінулага мардоўскі тэлеграм-канал Vandy.
Мардвінаў усяго налічваецца каля мільёна, прыкладна палова з іх адносяцца да субэтнаса эрзя (іншы субэтнас называецца мокша). Але ў выніку шматвяковай каланізацыі і асіміляцыі яны моцна расцярушаныя ў Паволжы, а ў самой Мардовіі складаюць толькі 33 працэнты насельніцтва.
«Ледяй» меў ехаць дэлегатам на Эрзянскі нацыянальны з'езд, які адкрываецца 30 верасня ў Эстоніі. Але ўжо не зможа. Цяпер актывісты просяць надаць пасмяротна украінскае грамадзянства «Жняцу».